مسلسل ليونيل ميسي (2) | أبواب السماء تفتح من بعيد

تابعنا عبر :
Twitter

يقدم لكم موقع بالجول خلال شهر رمضان المبارك قصة حياة الأرجنتيني ليونيل ميسي بشكل سردي مختلف يمزج بين الفصحى والعامية الدارجة، ونتعرف كل يوم خلال الشهر الكريم على اجزاء من حياة البرغوث ونعيش معه أهم لحظاته، فرحته، ومعاناته، نشوته، وكسرته في حلقات منفصلة يومياً.

المشهد الرابع

نهار خارجي – الشارع

ليونيل يلعب رفقة أطفال أكبر منه بقليل و لكن هذه المرة كرة قدم.

ميسي حافي القدمين يراوغ ويمرر و يفعل ما لا يصدق بالنسبة لشاب ضئيل الحجم في سنه، أحد المارة أعجب بما يقدمه هذا الطفل فوقف من بعيد يتابع كيف يلعب.

أقرأ أيضاً: مسلسل ميسي.. الحلقة الأولى: الطفل المخادع

ازداد حجم المتابعين لميسي و بدأت المنطقة التي يسكن فيها ليو تتحدث عن موهبته الغير عادية في كرة القدم.

في المرة التالية التي ظهر ليلعب فيها رفقة الأطفال في الشارع، شاهده أحد الكشافين لفريق نيولز أولد بويز الأرجنتيني.

كشاف نيو ويلز أولد بويز : انت اسمك ايه ؟

ليو : أنا اسمي ليونيل

الكشاف : انت ساكن فين؟ و باباك فين؟

ليو : هناك في البيت اللي في الشارع اللي ورانا ده، و بابا في المصنع ده

الكشاف : طيب تمام.

المشهد الخامس

ليل داخلي – منزل ليونيل

جرس الباب يضرب، و تفتح والدة ميسي الباب..

مساء الخير

أهلا مساء النور

مين حضرتك ؟ أي خدمة؟

أنا كشاف في نادي نيو ويلز أولد بويز و كنت عايز أقابل والد ليونيل

طيب اتفضل ، ثواني هبلغه.

مرت دقيقتين تقريباً و دخل والد ليو..

أهلا بحضرتك منور.

الله يخليك ده نورك، أنا هدخل في الموضوع على طول، أنا بصراحة شفت ليونيل و هو بيلعب أكتر من مرة و عجبني موهبته أوي و عايزين نخليه يلعب مع الأطفال اللي من سنه في النادي.

يا خبر دي حاجة حلوة أوي بس احنا على قد حالنا زي ما انت شايف، مش هنقدر نصرف على القصة دي.

لا لا متقلقش خالص ، الموضوع كله هيتكفل بيه النادي.

طيب تمام.

المشهد السادس

نهار خارجي ” مباراة لميسي في نيو ويلز أولد بويز “

ميسي يظهر أمام أعين كل الحضور أنه يتفوق على كل من في سنه و من هو أكبر منه ، لاعب موهوب لا خلاف على ذلك.

عقب المباراة يدخل مدرب نيولز أولد بويز على رئيس النادي..

ايه رأيك في الولد الجديد ده يا ريس؟

شوف بيلعب ازاي ” فيديو صوره لميسي ” ؟

ايه ده !! ده رهيب ، مش معقول

هاتهولي هنا حالاً

بعد 5 دقائق يدخل ميسي!

الرئيس للمدرب : ده هيلعب معانا في الفترة الجاية على طول، ابعتلي الدكتور عشان نكشف عليه وقصص الوزن والطول التقليدية دي

حاضر يا ريس!

في اليوم التالي…

ميسي في وجود والده خورخي لكي يوقع بدلاً منه على عقد مع النادي، يقف على ميزان الوزن و مقياس الطول وسط اندهاش من رئيس النادي والمدرب.

الريس: للأسف يا خورخي ابنك مش طبيعي

خورخي : أيوه انا عارف انه مش طبيعي ، كتير قالولي كده ، عنده موهبة غير طبيعية

لا لا مش قصدي كده! ، ابنك عنده مشكلة في هرمونات النمو و لو متعالجتش ممكن تأثر على حياته بالكامل

أقرأ أيضاً: مسلسل ليونيل ميسي (3) | الفراق وتهديد ريال مدريد

طب و الحل يا ريس؟

بصراحة احنا مش هنقدر نوفر له العلاج المطلوب، كان نفسي والله بس احنا امكانياتنا على قدنا ، ربنا يعينكو على البلوة دي

و يعود ميسي رفقة والديه إلى المنزل و يجران أذيال الخيبة.

المشهد السابع

ليل داخلي – منزل ميسي

سيلينا : و هنعمل ايه في ليو يا خورخي؟

العمل عمل ربنا بقى هنعمل ايه ، أديكي شايفة حالنا عامل ازاي، المرتب اللي باخده من المصنع على مرتبك من الخدمة في البيوت يادوب مكفينا احنا و العيلين الكبار، ماكانش في بالنا خالص موضوع الدوا بتاع ليو ده و حتى لو جبناه مرة و اتنين مش هنقدر نوفرهوله بعد كده.

و استمرت الحياة و لم يعد يذهب ميسي إلى النادي و اكتفى بالركض بالكرة في الشوارع.

و ذات ليلة طرق أحد الأشخاص باب أسرة ليو وفتحت سيليا وإذا به كشاف لبرشلونة الاسباني

مساء الخير ، أنا كشاف من برشلونة وعرفت بالمشكلة اللي بيعاني منها ليونيل و دي فلوس ليكم عشان توفروا له الدوا المطلوب في الفترة الجاية.

سيليا تمد يدها لتأخذ حفنة من النقود قبل أن يسحب الكشاف يده

الكشاف : بس أنا عندي شرط ، و بصراحة كده ، إحنا عايزنكو تيجوا على اسبانيا و تعيشوا في برشلونة و ميسي هينضم لأكاديمية النادي هناك و هيتعالج بالمجان لحد ما يخف و يبقى تمام التمام ، موافقين؟

موافقين طبعا!

جميع حلقات مسلسل ليونيل ميسي

كلمات مفتاحية